بەخێر بێن بۆ ماڵپەری فەرمی كۆنگرەی نەتەوەیی كوردستان كنك

دەستپێك ▶

جەژنی ئێزی ( یەزدا ) پیرۆز بێت.

ئەمڕۆ جەژنی دێرینی خەڵكی ئێمەی ئێزیدیەكان، جەژنی ئێزی یەزدا یە. ئەم جەژنە لە ھەموو خەڵكی ئێمەی ئێزیدی پیرۆز بێت. ئەمساڵ گەلی ئێمەی ئێزیدی بە خەم و پەژارەیی و خەمباریەكی گەورەوە پێشوازی ئەكەن. كوردانی لە دین و دینزا و باوەڕی جیا یەوە ھاوخەمی و ھاوشەریكی ئەم خەمە گەورەیەی ئەوانن. ئەم قڕكردن و فەلاكەتەی لە شەنگال بەسەری گەلی ئێمەی ئێزیدی ھاتووە، فەلاكەتی ھەموو كوردان بوو و كورد ھەمووی بەیەكەوە ئەم روداوە وەكو فەرمانێك كە بەسەری ھەموو كوردان ھاتبێ قەبوڵ دەكات.
ئۆرگانیزاسیۆنی تیرۆری بەناوی داعش پێش ئەوەی كە ھێرشی سەر شەنگال بكات، لە ھەموو لایەكەوە ھێرشی سەر تەواوی رۆژاوای كوردستانی دەكرد و ئێستایش بەردەوامە لە سەری. گەلی ئێمە لە عەفرین، كۆبانێ، سەرێكانیێ تاوەكو تلكۆچەر لە بەرەیەكی بەرفراوان دا وڵاتی خۆیان پاراست و دەیپارێزن. ھێرشی سەر كۆبانێ تا ئێستایش بەردەوامی ھەیە، بەڵام لە بەرامبەریدا گەلەكەمان، ھێزی لەشكری ی پ گ – ی پ ژ بە پشتیوانی پێشمەرگەكانی كوردستان ( باشوور ) بەرخوەدانێكی قارەمانانەی مەزن نیشان دەدەن و رێ لەبەردەم دگیری داعش دەگرن. ھێرشی داعش نەك تەنھا لەسەر خەڵكی ئێمەی ئێزیدی یە، بەڵكو لەسەر تەواوی كوردستانە.
دەوڵەتانی داگیركەر ئەیانەوێ بە دەستی ئەم گروپە تیرۆرستی یە دەستكەوتەكانی كوردستان لەناوببەن و رێ لە بەر ئاوابوون و ئاوەدانكردنی كوردستان بگرن. بەڵام خەڵكی ئێمە لە شەنگال و دەوروبەری شەنگال و ھەروەھا لە كۆبانێ و تلكۆچەر شەری پاراستنی نیشتیمان بە فیداكاریەكی بەرز و پیرۆزەوە بەردەوامی پێدەدەن. باوەڕیمان بەرزە بەوەی كە شەنگال لە دەستی ئەو دڕندانە ئازاد و رزگاری دەبێت و ئەو خاكە پیرۆز و دێرینەی كوردستان و تایبەت بە گەلی ئێمەی ئێزیدی دیسانەوە ببێتە جێگاو شوێنی ژیانێكی بەختەوەرانەی ئێزیدیەكان.
كۆنگرەی نەتەوەیی كوردستان – كنك، لە ساڵیادی جەژنی ئێزی یەزدان، بانگی ھەموو كورد و كوردستانیان دەكات كە لەم رۆژە پیرۆزەدا ھاوكاریێكی گەورە لەگەڵ پەنابەر و دەربەدەرانی خەڵكی ئێمەی ئێزیدی بكەن، ماڵ بە ماڵ سەردانیان بكەن و جەژنانەیان پێ بڵێن و بكەن.
كنك، بە ھیوای مەزنی رزگاری نیشتیمان و ئازادی میللەتی ئێمە وە جەژنی ئێزی یەزدانی خەڵكی ئێزیدی بە دڵگەرمیەوە پیرۆز دەكات.

كۆنسەی بەڕێوەبەری كۆنگرەی نەتەوەیی كوردستان – كنك
2014.12.19

راگەیێنراوی كۆنسەی بەرێوەبەری كۆنگرەی نەتەوەیی كوردستان – كنك

كۆنسەی بەڕێوەبەری كنك، كۆبوونەوەی ئاسایی خۆی لە ناوەندی كنك بە كارنامەیەكی تێروتەسەل و گشتگیر و تایبەت بە رۆژەڤی ئێستای پەیوەست بە یەكیەتی نەتەوەیی بەست. لەلایەك روداو و پێشھاتەكانی كوردستان، رۆژھەڵاتیناوەڕاست و جیھان بە بەرفراوانی شیكاری بۆ كرا و لەلایەكی ترەوە بارودۆخی ناوخۆیی كنك لە رووی رێكخستنەوە بە چڕی تاوتوێ كرا و بریارگەلێكی گرنگ و پێویستی بۆ درا. بڕیارەكان بەم شێوەیەی خوارەوەن:-
1. ئەو كەش و دۆخەی كە لە پارچەكانی باشوور و رۆژاوای كوردستان ھەیە، خۆی لەخۆیدا دەستكەوتی مەزن و مێژوویین بۆ گەلانی كوردستان، لەبەرامبەری ئەم دەستكەوتانە دەوڵەتانی داگیركەر پێی نارەحەتن و قەبوڵی ناكەن. ھەوڵ دەدەن بەھەرشێوەیەك بێت لەناوی بەرن و تێكی بدەن و بە ھەر رەنگێك بێت كێشە و ئاژاوە دروست دەكەن، ھێزی پاراملیتەرئۆرگانیزە دەكەن و وەكو گورگی ھار بە كوردستانی بەردەدەن. ئەم بەڵایەی رێكخراوی تیرۆرستی داعش بەو ئەجندا و ئامانجە دوژمنان تووشی كورد و كوردستانیان كردووە.
لە سەرەتادا ئەم گروپە تیرۆرستیەیان بەردایە سەر رۆژاوای كوردستان و دوای ئەوێ روویان كردە باشوور. كارەساتەكانی شەنگال و كۆبانێ بەم شێوەیە روویان دا. لە تێكدانی بارو رەوشی ئارامی كوردستان دا سەری ئاژاوە لە دەوڵەتی توركیاوە سەرچاوەی گرت. ئێرانیش دووڕوویی مێژوویی خۆی لەگەڵ توركیا لە پرسی كورد دا بە توندی و لە فشارخستنەسەر و تێكدانی دەستكەوتەكانی كوردان دا رۆلێكی زۆر دوژمنانە دەگێڕێ.
بەغدا لە پێشكەوتن و بەھێزبوونی كوردان ئەگەر بە نھێنیش بێت چاوی ھەڵنایە و لەدڵەوە خوازیارە كە كورد بەتێكڕا زەرەرمەندانە لەو ھەلومەرجەدا دەرچن. رژێمی شامیش كە خۆی كەوتۆتە داوی خۆیەوە و لەگەڵ برینەكانی خۆییشی بێ، لەبەرامبەر پرسی كورد دا رەفتار و تێڕوانینی لەمێژینەی خۆی كە ئانتی كوردستانە بەردەوامی پێدەدا.
توركیا زۆر بە كراوەیی و ئاشكەرا پشتگیری داعش دەكات و بە ھیوایە كە داعش حەز و داواكاریەكانیان كە شكاندنی ھێزەكانی كوردستانە لە رۆژئاوا بەجێبێنن. دوای گرتنی موسڵ لەلایەن داعشەوە، توركیا زیاتر یارمەتی داعشی دا و بۆ ھێرشكردنی كۆبانێ پڕ چەكی كردن. گەلی ئێمە، ھەموو كوردستانیان ھەم لە سەنگەرەكانی شەنگال و ھەم لە سەنگەرەكانی كۆبانێ شەڕێكی مەزنی پاراستنی نیشتیمانیان كرد لە بەرامبەر داعش و ئەم خۆڕاگری و بەرخوەدانە تا ئێستایش بەردەوامە.
لە پاراستنی شەنگال و كۆبانێ و ھەروەھا مەخمور وگەرمیانیش دا، پێكھاتنی ھاوسەنگەریی ھێزی لەشكری كوردستان ھ پ گ، پێشمەرگە و ی پ گ – ی پ ژ جێگای شانازی ھەرە گەورە بوو، لەم یەكگرتنە دا روون و ئاشكرا بوو كە بەھۆیەوە سەركەوتن دوای سەركەوتن دێنە دی. كۆنگرەی نەتەوەیی كوردستان بھاو نرخێكی مەزن دەداتە ئەم یەكگرتنەی ھێزە چەكدارەكانی كوردستان و بەھیوایە و داواكارە كە ئەم ھاوسەنگەریەی نێوان پێشمەرگە و گەریلا دا ھەتاھەتاییبێ.

2. دوای ھێرشەكانی داعش و دەوری تێكدەرانەی دەوڵەتانی داگیركەری وەكو توركیا و ئێران، لەنێوان ھێزە سیاسیەكانی كوردستان دا ھاوتەریبی ھاوسەنگەری لەشكری دیالۆگی ژیانی ھاتوونەتە كایەوە، رێكەوتنی ناوخۆیییش بەرەوپێش چووە. كۆنگرەی نەتەوەیی كوردستان – كنك، ئەم پرۆسێسە گرنگە دەبینێ، كە لە بواری سیاسیش دا رێكەوتنی ناوخۆیی ھەر رۆژێك زووتر بە ئومێدە بە ئامانج بگات.
3. خۆڕاگری و بەرخۆدانی كۆمەڵانی خەڵكی كورد و كوردستانی بەگشتی لە بەرامبەر داعش لە جیھاندا بووە جێگای شانازیەكی گەورە و دەنگی دایەوە، ئەم پشتیوانیە لە ئاستی بەیاننامە و قسە دا نەما، بەڵكو گەیشتە ئاستی ھاوكاری بەرچاوی لەشكری. بە تایبەتی ئەو كوالیسیۆنە نێونەتەوەییەی كە لە بەرامبەری داعش دامەزرا، لەرووی دانی چەكی قورس و ھێرشی ئاسمانیەوە كە یارمەتیێكی مەزنی ئەو پشتیوانیە نێونەتەوەییەبوو لە شكاندن و بێھێزكردنی ھێرشەكانی داعش. كنك بھایێكی گەورە دەداتە ئەو ھاوكاری و پشتیوانیە نێونەتەوەییە و ھەر لایەنێك كە بەشدار بووە تێیدا سوپاسی دەكات.

4. لەناو ئەو ھێرشانەی سەر كوردستانیش دا، ھەوڵەكانی چارەسەری پرسی كوردستانیش بەردەوامن. لە باكوری كوردستان لە نێوان ك ج ك و دەوڵەتی توركیا دا ئەوە ھەیامێكە كە وتووێژ لە ئارادان. لەگەڵ ئەوەی كە ك ج ك بە ھەموو ھێزی خۆیەوە ئەركی ئەو دیدارانە بەجێدێنێت، بەڵام دەوڵەتی توركیا تا ئێستا پرۆسەكە بە جیددی ناگرێت و بە تەكتیك و فێڵبازی رێویانە، ئەیەوێ سوود لە كات وەرگرێ و تەنھا بە دیدار پرۆسەی چارەسەری بەبێ ئەنجام بگەیێنێت. سەرۆكی گشتی ك ج ك بەڕێز عەبدوڵا ئۆجالان لەبەر ئەو فتنەكاریەی دەوڵەتی توركیا پلانێكی كۆنكرێتی ھەنگاونانی پێشكەش كردووە، بۆ ئەوەی پرۆسەكە بەرەوپێش بچێ. كنك، ئەم ھەوڵە بەنرخەی ئۆجالان بە گرنگ دەبینێ و پشتگیری لێ دەكات. لە ھەمان كاتدا بانگ لە ھەموو ھێزە كوردستانیەكانی باكور دەكات كە لەناو یەكیەتیەكی توندوتۆڵدا بن و بە ھێزێكی یەكگرتووانە فشار بخەنە سەر دەوڵەتی توركیا. ھەروەھا بانگی دەوڵەتی توركیا دەكات كە ئەم شانسەی كە لەلایەن كوردانەوە ھاتۆتەپێش بەگرنگ وەریگرێت و بەگوێرەی پێویست ھەنگاوی ئەرێنی بۆ بدا.
5. رژێمی ئێران لەناو ئەو ھەلومەرجەی رۆژھەڵاتی ناوەڕاست دا ، كە یەك لە ھۆكارە سەرەكیەكان خۆیەتی، رەفتاری تیرۆرستیانەی لەسەر كورد و كوردستانیان بەردەوامی پێدەدا. لەپێناو چارەسەری پرسی كورد زەڕەیەك خۆی ناجووڵێنێت و ھەموو ھەوڵەكانی چارەسەرییش رەتدەكات. لەلایەك بە گرتنی سیاسەتوانان خەبات و تێكۆشانی كوردستانیان ئەستەم و مافەكانیان بنپێدەكات، لەلایەكی تریشەوە لە زیندانەكاندا شیددەت و ئەشكەنجەیەكی ترسنۆكانە لەبەرامبەرگیراوانی سیاسی كورد و كوردستانیان پەیڕەو دەكات. سزای لەسێدارەدان ئەنجام دەدات و ئێستا بە دەیان زیندانی لە بەردەم سزادانی لەسێدارەدان دان. زیندانیانی سیاسی كوردستانی ئەمڕۆ بەرخوەدانێكی قارەمانانەیان دەستپێكردووە و بە تایبەتی ئەوانەی لە زیندانی ئورمیە دا زیندانین و زیندانیان لە پارتە جیاكانی كوردستانن و ئەوا بۆ ماوەی مانگێكە لەناو مانگرتنی برسیبووندان. داواكاریەكەیان ئەوەیە كە رژێمی ئێران كۆتایی بە لەسێدارەدان و ئەشكەنجە وزوڵم و زۆری ناو زیندان و دژی زیندانیان بێنێت و ھەروەھا بەم چالاكیەیان باڵ بكێشنە سەر ئەوەی كە رژێم بۆ چارەسەری پرسی كوردستان لەگەڵ بەرپرسانی سیاسی كوردستان دا دەست بە دیدار و گفتوگۆ بكەن. كنك، پشتیوانی ئەم چالاكی یەی زیندانیانی گرتوخانەی ئورومیە دەكات و بانگی كوردستانیان دەكات كە ئەو یارمەتی و پشتیوانیەی كە بۆ شەنگال و كۆبانێ نیشاندرا، بۆ بەرخۆدانی زیندانیانی ئورمیەش نیشان بدرێ.. خۆڕاگری و بەرخۆدانی زیندانیانی ئورمیە، ئەتوانری بكرێتە ترووسكەیەكی گەش بۆ بەرخۆدانێكی بەرفراوانتر. كۆنگرەی نەتەوەیی كوردستان – كنك بانگی دەوڵەتی ئێران دەكات كە دەست لەو سیاسەتەكانی خۆی ھەڵگرێت و رێ لەبەردەم دیالۆگ لەگەل ھێزە سیاسیەكانی كوردستان بكاتەوە بێتە سەر رێگای گفتوگۆ و چارەسەری.

6. كۆنگرەی نەتەوەیی كوردستان – كنك یەكیەتی ھێزە سیاسیەكانی رۆژاوای كوردستان لە دھۆك، كە لە مانگی رابردوودا ئیمزا كرا، بە ھەنگاوێكی گرنگ و ژیانی دەبینێت و پشتیوانی لێ دەكات، ھەروەھا لە لایەنە سیاسیەكان داواكارە كە بەرژەوەندیە نەتەوەیی و نیشتیمانیەكان لەسەرووی ھەر بەرژەوەندیەك بگرن و ئەم رێكەوتنەی كە پێكھاتووە رابگرن و توند و تۆڵی بكەن. سەركەوتن لە رۆژاوای كوردستان بە یەكیەتی ناوخۆیی مسۆگەردەبێ و ئەوەش ئەركی سەرشانی گشت ھێزەكی كوردستانی یە.

7. كۆنگرەی نەتەوەیی كوردستان – كنك لە ساڵی 2015 دا جڤاتی گشتی كۆ دەكاتەوە و خۆی لەبواری رێكخستنەوە نوێ دەكاتەوە. لە جڤاتی گشتی 2014 ەدا پەیمان و پەیڕەوی نوێ ی پەسەند كرد و جڤاتی گشتیی لە گوڵانی 2015، بە ئەندامانی نوێوە دەبەسترێ. كنك، پرۆسەی خۆنوێكردن ” رێفۆرم ” و ھەڵبژاردنی ئەندامانی نوێ دا دەستپێكرد و دەست بە ئامادەكارییەكانی جڤاتی گشتی 15 ەمین كرد. كنك، ئەندامەكانی و خەڵكی كوردستان ئاگادار دەكاتەوە كە لە قۆناغی ئەمڕۆی كوردستان دا رێكەوتن و تیفاقی ناوخۆیی، ئامانجی سەرەكی یە. پاراستن و مایەندەكردن و ھەروەھا وەدەستھێنانی دەستكەوتی زیاتر بە رێكەوتن و تیفاقی ناوخۆیی مسۆگەر دەبێ. گرنگی تیفاقی ناوخۆیی لە روداوەكانی پرسی شەنگال و كۆبانێ دا بەباشی بینرا. ھەر بۆیە كنك بە گرنگیەوە سەرنجی ھەموو كورد و كوردستانیان رائەكێشێتە سەر ئەم پرسەی یەكیەتی ناوخۆییە. كنك ئەوە 16 ساڵە لەو بوارە دا كار و خەبات و تێكۆشان دەكات. كنك بە ھەبوون و خەباتی 16 ساڵەی خۆی بووەتە زەمینەیەكی بەرچاوی رێكەوتن و تیفاقی ناوخۆیی. بەڵام ھێشتا ئەو تیفاقە ھەرە مەزن و بەرفراوانە پێكنەھاتووە. كۆنگرەی نەتەوەیی كوردستان – كنك تكا و داخواز لە ھەموو كوردستانیان دەكات، كە رێكەوتنی ناوخۆیی وەكو ئامانجێكی سەرەكی و ستراتیژی ببینن و بە گوێرەی ئەوەوە لە ناو كاری پراكتیكدا بن. كنك لە كات و ساتی پێكھاتنی جڤاتی گشتیدا ئامادەیە كە ھەموو فیداكاریەك بكات كە كورد و كوردستانییان بگەنە رێكەوتنی ھەرە بەرفراوان و مەزنی نەتەوەیی و نیشتیمانی.
8. ساڵی 2014 بە كۆتا دێت. لە ساڵی 2014 ەدا روداوی زۆر خەمبار و تراژیدی بەسەر كوردستان دا ھاتن، ھیواخوازین كە ساڵی 2015 ببێتە ساڵی خێر و خۆشی و سەركەوتنی مەزنتر بۆ ھەموو كورد و كوردسیتانیان و تەواوی مرۆڤایەتی. كنك لە ئێستاوە ساڵی نوێ ی 2015 لە ئەندامان و كوردستانیان پیرۆز دەكات.
9. ھەفتەی كۆتایی ئەم مانگە بۆ باوەڕمەندانی كرستیانەكان رۆژگەلی پیرۆزن، كنك، نوێل و یادی لەدایكبوونی حەزرەتی مەسیح لە كوردستانیان و جیھانی مەسیحي پیرۆز دەكات.

كۆنسەی بەڕێوەبەری كۆنگرەی نەتەوەیی كوردستان – كنك
2014.12.19 برۆكسل

راگەیێنراوی كنك بۆ رای گشتی كوردستان ھەموو ھێز و توانایەك بۆ یەكیەتی نەتەوەیی و نیشتیمانی كوردستان

راگەیێنراوی كنك
بۆ رای گشتی كوردستان

ھەموو ھێز و توانایەك بۆ یەكیەتی نەتەوەیی و نیشتیمانی كوردستان.

ھەلومەرج و دەرفەتی یەكیەتی نەتەوەیی و نیشتیمانی، لەبەر ھۆكاری ھەر كاودانێكی جیۆپۆلێتیكی، بارودۆخی وڵاتانی داگیركەر، بەگڕبوون و خاوبوونی خەبات و تێكۆشانی گەلەكەمان لە ھە پارچەیەكی كوردستانی دابەشكراودا و كاردانەوەكانی سیاسەتی ئیقلیمی و بە گشتی لە جیھانیشەوە بێت، نەیتوانیوە ھەوڵەكانی یەكیەتی نەتەوەیی و نیشتیمانی كورد و كوردستان بێ ئومێد بكات. لەھەر واقعێك و دوای ھەر گۆڕانكاریێكیش دا بێت، خەبات و ھەوڵی یەكیەتی و یەكڕیزی نەتەوەیی و نیشتیمانی بە ھیواو ئومێدەوە بەردەوامی ھەبووە.
لە رۆژگاری ئەمڕۆی خەبات و تێكۆشانی گەلەكەمان كە لەسەرەڕێی قۆناغێك دایە كە تا ڕادەیەكی بەرھەست و لەبەرچاوی لێكنزیكبوونەوە و ھاوسەنگەری و ھاودەنگی دایە. تەواوی خەڵكی كوردستان بە یەك ئاراستەیی و یەك ئامانجی وڵاتپارێزی بەرامبەر بە دوژمنان و ناحەزانی گەل و خاك و نیشتیمانمان لە خەبات و تێكۆشانی بێ وچان دان.
لە بواری كردەكی و پراكتیك و ئەزموونی دوور و درێژی خەباتی گەلەكەمان بۆ ئازادی و رزگاری كورد و كوردستان، راستی و باوەڕبوونێك سەری ھەڵداوە، كە ئەویش تاوەكو خاكی كوردستان رزگاری نەبێ، ئێمەی كورد و كوردستانیان ئازاد نەبین و بە ئیرادەی دیموكراتیانەی خۆمان بڕیاری مافی چارەنووسی خۆمان نەدەین، لە نیشتیمانی خۆماندا بە ھێزو بازووی خۆماڵی و زاتی خۆمان ژیانی دیموكراسیانە ئاوەدان نەكەین، پرسی یەكیەتی نەتەوەیی و نیشتیمانی، لە سەرووی رۆژەڤ و كارنامەی كورد و كوردستانیەكاندا دەبێت. لەو باوەرەشداین كەھیچ چارەیەكی بۆ نی یە و ئەو یەكیەتی یە ئەبێ پێكبێت.
بەخۆشحاڵیەوە، ئەمڕۆ كەم تا زۆر، تەواوی سەكۆكانی سیاسی و رۆشەنبیری، كۆمەڵایەتی و كایە رۆشنبیریەكانی كوردستان لەسەر ئەو خاڵە ھاوبیر و ھاودەنگ و كۆكن. ئەمە راستییەكە و بێگومان لە پاڵیشیەوە چەند حەقیقەتێكی تریش ھەن:- پارچە پارچەیی كوردستان لەڕووی جیۆجوگرافیەوە و ھەبوونی وڵاتانی داگیركەری جیا بە ئاراستەی ھزری جیاوە و رەوشی نالەباری ھەرچوار لەو دەوڵەتانە. سەرەڕای ئەوەی كە پەلەقاژێی روخان و لەناوچوونیانە و لەچاوەڕوانی ئایندەیەكی نادیاردان، بەڵام لەگەڵ خۆشیاندا ئاڵۆزی رێكخستنی و سیاسی گەورە پێكدێنن و راست و ناراستەوخۆ كاردانەوەیان لەسەر پرۆسەی سیاسی و بزووتنەوەكانی رزگاری كوردستان. راستیێكی تریش ئەوەیە، كە لە كەشی سیاسیی كوردستانیدا رێككەوتن و تیفاقی ناوخۆیی نابینرێ و بەشێوەی پلاتفۆرمێكی گشتی جیددیانە بۆ ئەو ئامانجە بەرچاو ناكەوێ.
لەمبارەیەوە ھەستی یەكیەتی لە چوارچێوەی گشتی دا لاوازە. ھۆكارو فاكتەرەكانی ئەم لاوازییەش زۆرن و لەھەمان كاتیشدا زۆرلایەنین. راستیێكی تریش ئەوەیە، كە لە چارەسەركردنی ئەم پرسەی رۆژ و پەیوەست بە ژیانیەی كێشەی كورد و كوردستان دا ئەگەرلە رابردوو دا خاو و لەسەرخۆشبێت بێت، بەڵام ھەرگیز ھەوڵ و تێكۆشانیش ھەبووە و ھەنگاویشی بۆ نراوە.

یەك لەو ھەوڵ و پێكھاتەیەش، ھەبوونی كۆنگرەی نەتەوەیی كوردستان – كنك ە یە. كنك لە ساڵی 1999 ەوە بەپێی پێویستی تیفاق و رێككەوتنی نەتەوەیی دامەزراوە و تەواوی كار و خەباتی خۆی لەپێناو ئەو ئامانجە تەرخانكردووە و لە خزمەت پرۆسەكردارێكی پراكتیكانەی نەتەوەیی و نیشتیمان دا بووە و تێكۆشاوە. كنك لە ماوەی ئەو 15 ساڵەیدا، گومانی تێدا نیە كە كۆنگرەی نەتەوەیی كوردستان كنك ە یش لەمەر راستی و حەقیقەتی پەرتەوازەیی كەشی سیاسیی كوردستان، كەوتۆتە بەر ھەوراز و نشێوی و ھەندێك جار لاواز و زۆر جاریش پتەو و كارا و بەھێز بووە. ھەرگیز لە كەناڵەكانی رێككەوتن و تیفاقی ناوخۆییدا سڵی نەكردووە. لە رۆژگاری ئەمڕۆ دا لە سەرانسەی كوردستان و مەیدانەكانی تاراوگە ( دیاسپۆرا ) دا، بە بەشداری 55 پارتی و رێكخستنی سیاسی، مەدەنی، دیمۆكراسی و رۆشەنبیری، لەگەڵیاندا كەسایەتی سەربەخۆی سیاسی و روناكبیر بە گشتی 250 كەس لە ناو كۆنگرەدا ئەندامی كارا و لێھاتوو ھەیە و كنك بەو پێكھاتەی خۆیەوە ئەگەر سەد لە سەدیش نەبێ، نوێنەرایەتیێكی نەتەوەیی و نیشتیمانی كوردستانی دەكات.
لە وار و كەتواری ئەمڕۆدا، دەبینری كە داواكاری و بەدواداچوونی رێككەوتن و ھەرە گەورە ی ناوخۆیی ھەیە و رەنگە ھەولیش لە ئارادابن، لەھەمان كاتدا كۆنگرەی نەتەوەیی كوردستان – كنك یش لە ھەموو كۆڕ و كۆبوونەوەو مەراسیمەكانی خۆیدا دەستنیشانی ئەم پرسە گرانە دەكات و ھەردەم بانگەوازی خۆی بۆ رێككەوتنی بەرفراوان و مەزن لە ھەر دەرفەتێكدا دووپات دەكاتەوە. بەھەمان شێوە ئەمرۆیش ھەروا بیر دەكاتەوە. ھەر لەبەر ئەم راستیەش، بۆ ھەوڵدانی كۆنگرەی نەتەوەیی كورد ئەوەی كە لە گەلاوێژی 2013 دا لە شاری ھەولێر كۆمیتەی ئامادەكاری بۆ دروستكراو كنك بەشداربوو تێیدا و لە خەباتی ئامادەكاری دا جێگای گرت و ھاوكار بوو. بەڵام بە داخەوە ئەو ھەوڵە سەرینەگرت. كۆنگرەی نەتەوەیی لەھەر فرسەتێكدا داوا لە ئاكتۆرەكانی سیاسەتی كورد و كوردستانی دەكات كە ئەو خەباتە بەردەوامی پێبدرێ.
ھەنگاوەكانی رێفۆرم و نوێكردنەوەی خەباتی كۆنگرەی نەتەوەیی كورد، كۆنگرەیەكی نەتەوەیی و نیشتیمانی بەرفراوانی ھەرە مەزنیشی پێویستە كە لە ھەوڵە شەفاف و دیموكراسیانە دا بكرێت و ھیچ لە دینامیك و پایە نەتەوەیی و نیشتیمانیەكان لە دەرەوەی پرۆسەی دامەزراندنی ئەو یەكیەتیە مەزنە پشتگوێنەخرێت. بە تایبەتیش كۆنگەری نەتەوەیی كوردستان – كنك، كە ئەوە بە درێژایی 15 ساڵە لە پێناو ئەو مەبەستە و بە ئامانجی یەكیەتیی كورد و كوردستان دامەزراوە. بۆیە دەبێ كنك لە ناوەندی ئەم خەباتە دا جێبگرێ. بە ئەزموون و زانیاری و شارەزایی ئەندامانی خۆیەوە بە كردەوە ( كنك ) دەتوانێ بۆ خەبات و ئەنجامدانی ئەم ئەركە ببێتە پێگە و ھەروەھا ئامادەیشە ھەر چی گۆڕانكاریەك داوادەكرێت، لەناو خۆیدا پێكیبێنێت. لە دامەزراندن و ھەبوون و بەردەوامی خەباتی كۆنگرەی نەتەوەیی كوردستاندا رەنجێكی یەجگار گەورەی سەدان رێكخستن و كەسایەتی سیاسی و رووناكبیری كورد و كوردستانی دراوە.

كۆنگرەی نەتەوەیی كوردستان – كنك بە ھیوایە كە ھەموو ئەندامانی و ھەروەھا ھەموو پۆیا و دینامیكە نەتەوەیی و نیشتیمانیەكانی كوردستان لەسەر ئەم پرسەی پەیوەست بە ھەبوونەوە بە جیددی بوەستن و ئەو یەكیەتی یە نەتەوەییەی كە ھەموو كورد و كوردستانیان چاوەڕوانی دەكەن، بە سەرفەرازی و سەركەوتووی پێكیبێنین. رۆژ رۆژی نیشاندانی غیرەتی رێككەوتنی نەتەوەیی و نیشتیمانی بەرفراوان و گەورەیە.

دوای سەد ساڵ، دیسانەوە رۆژھەڵاتی ناوەڕاست لە نوێوە دیزاین و سازدەكرێتەوە، گەلی كورد و كوردستانیش لە سەردەمێكی مێژوویی و وەرچەرخاندا تێدەپەڕێ. ھەرچەندە بارودۆخەكە لە رێڕەوێكی مەترسیداردا دەگوزەرێ، بەڵام دەرفەت و دەستكەوتی مەزنیش ھەن. شەڕی ئێمە لە دژی تیرۆر، بەرخۆدان و خۆڕاگری بێ ھاوتای كچ و كوڕانمان لە بەرامبەر ئەو ھێرشە دڕندەییانە، بوونەتە داستانی قارەمانیەتی گوێی ھەموو دونیایان تەنیوە. ئەو یەكە لە ناوەندەكانی نێونەتەوەیی دا رێگاو دەرگا و ئیمكانانیاتی تازەی بۆ كردووینەتەوە. بەڵێ كوردستان بێش سەد ساڵ لەسەر چوار وڵاتدا پارچەكرا و مافەكانی خورا ھەروەھا پشتگوێشخرا، بەڵام ئەمڕۆ واقعێك و راستیێكی ھەرێمەكەیە و خۆی لە لایەن دۆست و دوژمنانی یەوە دەداتە قەبوڵ كردن و حیسابی بۆ دەكرێ.
كارەسات و روداوەكانی شەنگال و كۆبانێ زۆر بەڕوونی نیشانی دا، كە رێككەوتنی مەزنی كورد و كوردستانیان، ھاوسەنگەری ھێزە چەكدارەكانی كوردستان چەندە گرینگ و پەیوەستن بە ژیانەوە، كە مان و نەمانی كورد و كوردستان بەو یەكیەتی یە مەزنە نەتەوەیی و نیشتیمانیەوە گرێدراوە و پەیوەستە. ئەگەر لەم كۆنژۆكتۆر رێكخستنە ئەرێنییە نەتەوەیی، ھەرێمی و نیونەتەوەییەی پرسگرێی كوردستان دا یەكێتیەكی رەھا و بەرفراوان درووست نەبێت، ئەوا لە بەردەم خەڵكی كورد و ھەموو كوردستانیان دا دەبێتە گوناھكاری و تاوانێكی زۆرگەورە.
ئێمە وەكو كۆنگرەی نەتەوەیی كوردستان – كنك، بۆ ئەو ئامانجە ، ئامادەین بۆ ھەموو فیداكاریێك و راپەڕاندنی ھەر ئەركێك، لە پێناوی ئەوەی كە كورد و كوردستانیان بە ئاوات و خۆزگە و داواكاریەكانیان بگەن، كە ئەویش یەكیەتی و رێككەوتنی پیرۆزی ناوخۆیی یە.
ھەموو ھێز و توانایەك لە پێناو یەكیەتی نەتەوەیی و نیشتیمانی كورد و كوردستان.

كۆنگرەی نەتەوەیی كوردستان – كنك
28 . 11 . 2014 برۆكسێل

راگەیێنراو: نا بۆ بۆ بنبڕكردنی ئاسوری-كلدانی- ئەرمەنی و كریستیانەكان لە عێراق

نا بۆ بۆ بنبڕكردنی ئاسوری-كلدانی- ئەرمەنی و كریستیانەكان لە عێراق

لە ساڵی 1990 بە سەرەوە، رۆژھەڵاتی ناوەڕاست لە ناو سیناریۆیەكی مەترسیداردا دەگوزەرێ. بە ھۆی شەڕی نەگریسی دەوڵەتانی رۆژئاواوە، ئەم جوگرافیە خوێناویە وەك جەنگەڵێكی لێھاتووە. ئەو گەلانەی كە نە عەرب و نە موسوڵمانن، بە ڕشتنی خوێن و كوشتن لەبندەبرێن. لەم جوگرافیەیە بریندار و دەوڵەمەند و سەرچاوەی نەوتەدا، گەلانی رەسەن و مێژوویی و خاوەن باوەڕی جیا جیاھەموویان لە لێواری لەناوبردندان.
لەو ماوەیەی دواییەدا، لە دەكۆمێنتە وێنەیی و ڤیدیوییانەی كە لە مێدیاكانەوە دەبینرێ و بە شێوەیەكی بەرفراوان بڵاودەبنەوە، ئەو زەمینەی رۆژھەڵاتی ناوەڕاست بوەتە جوگرافیایەك لە گۆمی خوێن و مردن. نەیناوا ” موسڵ ” ئەم شارە مێژوییە، وا ئەسووتێ، تەخت ئەبێ و لە جیھان دا دەنگێك دەرناكەوێ. ئەم خاكێك كە سەدان ساڵ تەمەنیەتی بەرەو مەرگی ئەبەن، ئاسوری، ئەرمەنی، ئێزدیە كوردەكان، شەبەكە كوردەكان و ھەروەھا بە گشتی كورد لەبەر مەترسی بنبڕكردندان. ئەیانەوێ ئەم گەلانە لە مێژوو دا دەربكرێن. دیمۆگرافیای نەخشەی رۆژھەڵاتی ناوەڕاست لە گۆڕانكاریدایە. گەلانی ھەرە كۆن، لەسەر خاك و وڵاتەكەیان دەسڕرێنەوە. لە ھیچ كەسێكەوە دەنگ دەرناكەوێ. كریستیانەكانی رۆژھەڵات كران بە فیدای بەرژەوەندیەكانی دەوڵەتە زلھێزەكان. بەداخەوە، لەسەر خاكی خۆی، لەلایەن رێكخراوە تیرۆرستەكانی ئیسلامی رادیكاڵ، وەكو داعش، ئەلنوسرە و ئەلقاعدە خەڵك بە دیلی ئەگرن، بەزۆر ئاین و باوەڕیەكانیان ئەگۆڕن یان بە جەزیە و باجێكی گەورە تاڵاندەكرێن. ئەو جوگرافییایە لە كرستیانەكان چۆڵ دەكرێت، ئێستا ئەم خاكەلەسەر لاشەی نەوەكانی خۆی دەگری. رۆژھەڵاتی ناوەڕاست لە قووڵایی دڵی خۆیەوە دەكوڵێ، ئەگری و ھاواردەكا. لەبەرامبەر ئەو وەحشیەت و دڕندەییەی كە لە عێراقدا دەگوزەرێ، ئەوروپا بێدەنگە، ئەمەریكا بێدەنگە، ئەوەی لە ھەمووی خەرابتر و ئازاردەر، تێكڕای مرۆڤایەتی لاڵە. لە رۆژھەڵاتی ناوەڕاست خوێنی مرۆڤ؛ لە ئاو، لە نەوت ھەرزانترە. رێكخراوی تیرۆرستی داعش، كە ئەمریكا و كۆماری توركیا دروستیان كرد وعەرەبستانی سعودی و قەتەر بەخێویان دەكەن لە نەیناوا ” موسڵ ” بە ئێسقانی مرۆڤەكان خوێن دەخواتەوە..
لە موسڵ، مەترۆپۆلیتانی كریستینەكانی كاتۆلیك، كەنیسە و پەرستگاكانی كلدانیە ئاسوری و ئەرمەنیەكان دەسووتێنرێن. ئەو مرۆڤانەی كە دەشكوژرێن، تەنھا یەك گوناھیان ھەیە ئەویش كرستیانیبوونیانە. ئەم گەل و ئەم مرۆڤانە، لە مێژەوە وەكو قوربانی ھەڵبژێردراون. لە ساڵی 1915، ئەمەریكا و ئەوروپا، ئەمرۆیش لە بەرامبەر ئەم كۆكوژی و بنبركردنە كەڕ و لاڵە.
چەتەكانی داعش، ئێستاش بەڕێگای مێدیاكانەوە داوا لە كریستیانەكانی موسڵ دەكا: یان ببن بە موسوڵمان یان تەركی جێگاو شوێنەكانتان بكەن. بۆ ئەو كەسانەی كە تەركی موسڵ ناكەن فەتوای سەربڕینیان بۆ دەركراوە. دوای ئەو فەتواو فەرمانە قێزەونە، ئاسووری- سریانی- كلدانیەكان خاك و جێگای خۆیان بەجێھێشت. لە دوا خاڵێ كۆنتڕۆڵ پێشیان لێگیرا و ھەموو پێداویستی ژیاژ و زێڕ، دراو ” پارە ” و جلوبەرگ و كەرەستە بە گرانبەھاكانیان غەنیمەكران و ئینجا ئازادیان كردن كە كۆچ بكەن. مەسیحیەكانی لە موسڵ ھەمووی رائەكەن. لەبەر ئەو وەحشیەتگەریەی كە لەبەرامبەریان دەكرێ. باوەڕیەكان ھێزیان لەبەر نەماوە، نرخ و بەھا پیرۆزیەكانی مرۆڤایەتی لە نزمترین ئاستدایە. مرۆڤایەتی ژێرپێ دەنرێ و ھەتك دەكرێ و دونیای مرۆڤایەتی بێدەگە لێی. لە كاتێكدا لە جیھان ئەگەر دەنگھەڵبڕین و ھاواركردن بۆ فریادرەسی نرخ و بەھا و پیرۆزیاكان كپ بكرێ، ئەو كاتە مرۆڤایەتییش تیرۆر دەكرێ. ئەو مرۆڤانەی كە ترسی دڕندەیی و وەحشیەت و بەربەرگەری تیرۆرستانی داعش رائەكەن، ئێستا وا لە ناوچە ئازادكراوەكانی باشووری كوردستانن، لە شارودێیەكانی ئەوێ بڵاوبوونەتەوە.
ئێمە وەكو كۆنگرەی نەتەوەیی كوردستان – كنك، داوا و تكا لە دەستەڵاتی باشوری كوردستان دەكەین كە گەل ومیللەتی ئاسوری-كلدان و ئەرمەنیەكان بە گەرمیەوە لە باوەش بگرن و لێیان بە خاوەن دەركەون. ھەروەھا بۆ ئەمن و ستر و ئاسایشی ئەوان لە ھەرێم و بۆ گەڕانەوەیان بۆ سەر خاك وجێگاكانی خۆیان كری پێوستیان بۆ بكرێ.

نەینەوا ” موسڵ ” لەژیر بەرپرسیارێتی بەغداد دایە، ئەو ماڵ و موڵكەی كە لەم ھاوڵاتیانە بە تاڵانبراوە تەواوەتی ئەو زەرەر و زیانەیان كە بەركەوتووە، ئەركی سەرشانی دەوڵەتی عێراقە كە بۆیان قەرەبووبكاتەوە.
ئێمە، لە ئەمەریكا، ئەورۆپا و تەواوی كومەڵھای جیھان داواكارین كە لە بەرامبەر ئەو بەربەریەت، بنبڕكردن و تاوانی دژ بە مرۆڤایەتیە بێنە دەنگ.
ئێمە بانگ لە تەواوی سازیە كۆمەڵایەتیەكان دەكەین ئەوانەی بە ھەستیاریەوە لە بەرامبەر ئێش و ئازارەكانی گەلی فەلەستین نیشان دەدەن و پشتگیریان دەكەن، بەھەمان شێوە لە بەرامبەر ئەم گەلانەش نیشانی بدەن.
دیسانەوە ئێمە لە كۆنگرەی نەتەوەیی كوردستان – كنك، ئەو تاوانە دڕندەیی و بەربەریەتانەی كە لەبەرامبەر ئەم گەلانە ئەنجامدەدرێ زۆر بە توندی شەرمەزار دەكەین. وەكو خۆی بۆ رای گشتی جیھانی بەیان دەكەین كە ئێمە ھەردەم و بە ھەر شێوەیەك بێت لەگەڵ و لە پشت ئەم گەلانەوە بین و ھاوكار ویارمەتیدەریان بین.

كۆنسەی بەرێوەبەری كۆنگرەی نەتەوەیی كوردسیتان – كنك
25 خەرمانان 2014 برۆكسل